عصام احمد : مين اللى قطع الوتر فى عودك يا مصر ؟
التاريخ: الثلاثاء 02 يوليو 2013
الموضوع: قضايا وآراء


مين اللى قطع الوتر فى عودك يا مصر ؟

امبارح بس عرفت
انه الموت محاصرك يا طيبه
  


مين اللى قطع الوتر فى عودك يا مصر ؟

امبارح بس عرفت
انه الموت محاصرك يا طيبه
امبارح بس عرفت ان عودك اتقطع منه الوتر
امبارح بس امبارح انا صحيت من نومتى الطويله
ومن كوابيسى التقيله
وعرفت انك يا طيبه بتتباعى حته حته
اليوم الكنال بعد ساعه نهرك
وبكره هرمك الكبير عشان يدفنوا الصغير
والوسط ملوش فيك سكه يا بلادى الطيبه
كبيرك القزم خطب وقال وهدد ومال
وقال فصله التانى من حكاوى القهاوى
مصر صارت تكية الاخوان وانتم هاجروا مع العربان
ملكوش الا تكونوا عبيد ونسوانكم جوارى
وانتم يللى رضيتوا تغيروا فى سفر الزمن فرعون
اتحملوا الاله ومين اللى يقدر يقول للاله لا ؟
اتقطع وتر اغنية الفرح وحل مكانه هتاف مغلف بالفضيله
واللى بيغنيه هو اصل الرذيله
يا مصر فى يوم عيدك ... يوم ثورتك ... يوم هيجانك
لازم تعيدى الوتر وتعزفى لحن القمر
وتعيدى لمختار بسمته هو اللى بشر بنهضة مصر
ولرفعت بحة صوته بيجلجل بالاذان ووتحوم الملايكه على راس البشر
قومى يا مصر عشان نقوم
بلاش نتشل وتموت ايامنا ونصبح معدومى البصر
صلحى عودك يا مصر واضربى المرشد والمنشد والحرامى
والريس اللى بده يهدم عشقنا وفرحنا وبكانا ورزقنا
وقمحنا وملحنا ونارنا ونهرنا وتاريخنا
وكل اللى فى خوابينا
عايز يسرق حتى اللى فى جيوبنا
انهضى يا مصر وقومى يوم الثلاثين لتعيدى
بسمة طفل وخطوط فى وجه عجوز
وتاريخ بيصرخ باعلى الصوت على اللى بيهدوا كل شئ حتى
الجامع والكنيسه
وكأن الدين حدوته يضحكوا فيها على ذقوننا
لحتى ننام ننام ننام وما نصحى
لكن
صحينا من الكابوس
ومش حنسمح بحكم التيوس

مع كل الحب

بقلمى

عصام احمد






أتى هذا المقال من جريدة الصباح الفلسطينية
www.alsbah.net

عنوان الرابط لهذا المقال هو:
www.alsbah.net/modules.php?name=News&file=article&sid=19100