سحر فوزى : نفسك فى إيه؟
التاريخ: الخميس 20 ديسمبر 2012
الموضوع: قضايا وآراء


نفسك فى إيه؟


نفسى أرجع تانى حتتنا
أنا وأبويا وأخواتى ولمتنا
نستنى لما نتجمع على لقمتنا


نفسك فى إيه؟


نفسى أرجع تانى حتتنا
أنا وأبويا وأخواتى ولمتنا
نستنى لما نتجمع على لقمتنا
ويوم الجمعة نتقابل عند جدتنا
نشوف عمى وخالى وعمتنا
نضحك من قلوبنا على نكتتنا
وجيراننا الطيبين يزعلوا لزعلنا ويفرحوا لفرحتنا
وتانى يوم نجرى على مدرستنا
أصحابى ماليش غيرهم مانفترقش حتى فى مذاكرتنا
ياكحك العيد يافرحتنا
زيارات وود ومحبة جمعتنا
ساعة العصارى سومة تنشدنا
الكل واقف فى البلكونه يرددها
اروح لمين يقدر يقلدها
ويافرحتنا لما أبونا يوعدنا
بفسحه على النيل مهى دى كانت متعتنا و فسحتنا
نجرى ونلعب أنا وإخواتى من غير ماحد يقيدنا
نسهر براحتنا وعسكرى الدورية يحمينا ويسندنا
لاقاطع طريق عمرنا شفنا
ولا بلطجى يقدر يبص لبنت حتتنا
ياترى وخدانا على فين ياثورتنا
حترجعينا زى ماخدتينا ولا حنفضل على حالتنا
خوف ورعب وخطف لبناتنا
وقتل وحرق فى مدينتنا
نفسى نحس بالأمان وننام ونقوم نحلم بجنتنا
اللى إتربينا فيها وكبرتنا وعلمتنا
أيام ما كان حتى الشيطان مايقدر يفرق للحظة وحدتنا
كفايا بقى خلونا نشوف شغلتنا
ضيعنا وقت كبير فى اللى عمله فتوتنا
ياريت يفتكروا أيام الشهامة اللى فاتتنا
اللى خلت الأم تضحى بفرحتها
علشان تحرر مصر اللى الأيدين بعود كبريت حرقتها
لو كانوا داقوا غربتها
لباسوا ترابها وحافظوا عليه.... مهو ده فى النهاية تربتنا.

بقلم/ سحر فوزى/ كاتبة وقاصة مصرية/19/12/2012







أتى هذا المقال من جريدة الصباح الفلسطينية
www.alsbah.net

عنوان الرابط لهذا المقال هو:
www.alsbah.net/modules.php?name=News&file=article&sid=15385