سحر فوزى : المكالمة الضاحكة(13)
التاريخ: الخميس 26 أبريل 2012
الموضوع: قضايا وآراء


المكالمة الضاحكة(13)
سحر فوزى

ألو ..أزيك يابنى...عامل ايه فى غربتك...اطمن علينا خالص... والله التسلية هنا للركب ...كل شوية يطلع موضوع الناس تتكلم فيه ويكتبوا


المكالمة الضاحكة(13)
سحر فوزى

ألو ..أزيك يابنى...عامل ايه فى غربتك...اطمن علينا خالص... والله التسلية هنا للركب ...كل شوية يطلع موضوع الناس تتكلم فيه ويكتبوا ويصرخوا فى مجلس الشعب ..وبعد كام يوم ينسوه اول ما يظهر موضوع غيره...واهم قعدوا يتكلموا عن الاموال المنهوبة وبعدين سكتوا...وبعدها محاكمة الرئيس المخلوع ومن كتر التأجيل نسيوا.... وجت قضية التمويل الاجنبى وأزاى يرحلوا المتهمين والآخر ملوا...وبعدين مسكوا فى المناخير وعملية التجميل وهات ياتريقة لغاية لما قرفوا ....ولما جه الترشيح للرياسة فصصوا واحد واحد وقعدوا يتكلموا عليه لما صدعونا والآخر هديوا....ودلوقت ماسكين فى حكاية قطع الغاز عن اسرائيل و الاشاعات والحكايات لما طهقوا .... مش كفاية الهم اللى الواحد فيه ...ده الناس ما بتنمش الليل من التفكير فى بكرة وازاى حتشحن موبايلاتها ...واهى شركات الموبايل مشكورة اتفقت علينا قال ايه لما نشرب مشروبات غازية تكافئنا بدقايق مجانية...واهو المشروب مضر والكلام فى المحمول أسخم وأدل....وطول النهار الناس عمالة تشرب وتخربش وبعد ما بطنها تتنفخ من كتر الشرب تيجى تتكلم ترد عليها الاخت الفاضلة اللى بتقول (لقد نفذ رصيدكم يرجى اعادة شحن البطاقة) ...والله الواحد لو ما سمعش صوتها يوم يحس ان فيه حاجة نقصاه...بس لو اعرف مين اللى مسلطها علينا .... طول النهار الناس تشترى فى كروت شحن زى المجانين ويدوب يقولوا كلمتين ويخلص الكارت... سيبك انت ولا تجارة فى الممنوع ولا وجع قلب...اهو ادمان على عينك ياتاجر ...والمستشفيات مش ملاحقة اشى سمنه واشى هشاشة عظام واشى سرطان ...والناس ماشية ومش شايفة قدامها وعمالة تتكلم فى كلام فاضى وبعدين يقولوا نجيب من اين ؟ بقول لك ايه انا حاقفل معاك دلوقت.. اصل مرات عمك ولدت وهى قاعدة تعمل شات على النت وحأروح اجيب للمولود موبايل هدية علشان اول ما يتكلم ..عمك يشحن له على طول!!!! المصريين اهم.

كاتبة وقاصة مصريةالقاهرة 24/4/2012






أتى هذا المقال من جريدة الصباح الفلسطينية
www.alsbah.net

عنوان الرابط لهذا المقال هو:
www.alsbah.net/modules.php?name=News&file=article&sid=10661